​បើ​​​យោង​​​តាម​​​ការ​ចុះ​​ផ្សាយពី​​ ​​​ក្រសួង​​ព័ត៌មាន​​ បាន​ឲ្យ​ដឹងថា​ ​នាវាទេសចរណ៍បរទេស ០១គ្រឿងនេះ មានឈ្មោះ CASTA SERENA បាននាំភ្ញៀវ ទេសចរបរទេសចម្រុះជាតិសាសន៍ជិត ៣ ០០០នាក់ ចូលចតកំពង់ផែស្វយ័តក្រុងព្រះសីហនុ ក្នុងគោលបំណងធ្វើទេសចរនៅលើទឹកដីនៃព្រះរាជាណាចក្រកម្ពុជា ពិសេសខេត្តព្រះសីហនុ ក្នុងដំណើរកម្សាន្តតាមឆ្នេរសមុទ្រ តំបន់រមណីយដ្ឋាននានា ទីប្រជុំជនសំខាន់ៗក្នុងខេត្តព្រះសីហនុកាលពី​​ថ្ងៃទី​២០ ខែឧសភា ឆ្នាំ២០២៣  ។​

យ៉ាង​ណាមិញ​ សម្រាប់​​​លក្ខណ:ពិសេស​របស់​នាវានេះ បើ​យោងតាម​ប្រភពពី​ មន្ត្រីនគរបាលអន្តោប្រវេសន៍ច្រកទ្វារកំពង់ផែស្វយ័តក្រុងព្រះសីហនុ បានឱ្យដឹងថា នាវាទេសចរណ៍បរទេស CASTA SERENA សញ្ជាតិ Italy មានបណ្ដោយ ២៩០,២០ម៉ែត្រ ទទឹង ៣៥,៥០ម៉ែត្រ និងជម្រៅទឹក ៨,៣០ម៉ែត្រ ផ្ទុកភ្ញៀវទេសចរចម្រុះជាតិសាសន៍ចំនួន ២ ៦៤៣នាក់ ស្រី ១ ៥៤៥នាក់ មាន ១៨សញ្ជាតិ និងមាននាវិកសរុបចំនួន ១ ០៥៧នាក់ ក្នុងនោះស្រី ១៧៣នាក់ មាន ៣៣សញ្ជាតិ ។

​​​​​​​លោក​​ក៏បាន​បញ្ជាក់​ទៀតថា នាវាទេសចរណ៍នេះ បានធ្វើដំណើរមកពីប្រទេសថៃ ចូលចតនៅ កំពង់ផែស្វយ័តក្រុងព្រះសីហនុ កាលពីវេលាម៉ោង ១០ និង២០នាទីព្រឹក ថ្ងៃទី២០ ខែឧសភា ឆ្នាំ២០២៣ តាមការគ្រោងទុកនាវាទេសចរណ៍នេះ នឹងចាកចេញពីកំពង់ផែ ស្វយ័តក្រុង ព្រះសីហនុ ឆ្ពោះទៅកាន់ប្រទេសវៀតណាមនៅវេលាម៉ោង១៧ ថ្ងៃទី២០ ខែឧសភា ឆ្នាំ២០២៣។

គួរ​ជំរា​បផងដែរថា ភ្ញៀវទេសចរដែលធ្វើដំណើរតាមនាវា CASTA SERENAនេះ មានសញ្ជាតិច្រើនជាង គេគឺជន​ជាតិថៃ មានចំនួន ២ ៥៨៦នាក់ ក្រៅពីនោះ មានភ្ញៀវទេសចរចម្រុះជាតិសាសន៍ផ្សេងទៀត៕

អត្ថបទ៖ ព្រឹម ភក្តី